يجب عليه أن يلتزم بالشرط

السلام عليكم ورحمة الله وبركاته ياشيخ .. ارجو المساعده .. انا بنت عمري 21 سنه تزوجت من 7 شهور .. زوجي عمره 21 اي بمثل عمري .. انا طالبه وهو يعمل .. زوجي دايم يسئ معاملتي وانا ربي الشاهر اني ما اقصر معاه بشي دايم اعطيه كامل حقوقه .. احاول قد مأقدر اكون له الزوجه المثاليه ولكنه دايم يسئ معاملتي .. ياشيخ انا طالبه في الجامعه وشرطي الوحيد لما عقدنا القران كان اني اكمل جامعتي وانه يساعدني على كل خطوه اخطيها في دراستي الجامعيه .. ولكني مأحصل منه هذا الشي .. ياشيخ انا تقريبآ اكملت اسبوعين وانا في بيت اهلي .. الذي حدث اهلي طول السنه يوصلوني الجامعه وبيتهم بعيد اما بين بيت زوجي و الجامعه 7 دقايق بالسياره .. ياشيخ انا قبل اسبوعين كنت في الجامعه و كنت مريضه واعاني من ألم اتصلت لزوجي وقلت له انت ف البيت تعال وخذني من الجامعه قالي لا انا مراح اخذك قلت له اهلي في المستشفى وعندهم ظرف محد يقدر ياخذني تعال خذني وكنت اكلمه بالسياسه .. قالي انتي تحسديني لآني انا جالس في البيت وانتي هلكانه في الجامعه .. اقوله حرام عليك انا تعبانه مريضه وانت تدري .. قالي خلي اهلك يجيبونك .. اختلفت وياه وسكرت الجوال بعدها كلمت امه قلت لها الي صار .. قالت لي هو تعبان ومن هالكلام كانت في صفه قلت لها طيب شوفي لي احد يجي ياخذني .. قالت انا بكلمه طنشت لي وياشيخ جلست من الساعه 9 الصباح لين 4 العصر وانا في الجامعه وفي الاخير اهلي هم الي خذوني .. مريت بيت زوجي بعدها ابي اخذ اغراضي مقفل علي الباب مايبي يفتح مريت بعدها بيومين نفس الشي مايبي يفتح لي .. ولليوم جالسه في بيت اهلي بدون اغراض .. الا الوالده والوالد اشتروا لي اغراض .. حاولت امي تتفاهم معاهم ام زوجي كانت تصرخ على امي ولا تبي تتفاهم وياها وتقول ان انا كاذبه وكل الي قلته لهم كذب وانا ياشيخ والله مازدت عليك ولانقصت هذا الي صار .. بس ياشيخ هذا مب كل شي .. هذا ولا شي لما اطلب منه غرض من الجمعيه الي بينها وبين بيتنا 5 دقايق يقولي خلي سواق بيت اهلك يجيك من مشوار مدته ساعه عشان الجمعيه الي بينها وبين البيت 5 دقايق .. ياشيخ انا عافه خاطري .. احس اني عنده ولا شي مجرد " زوجه " بالأسم ياشيخ من دخلت بيته للحين وانا نفسيتي تعبانه .. اهله معاملتهم لي سيئه وهو بعد يوم يحبني ويوم يزعلني ويوم يصرخ علي بدون سبب ويوم يبيني ويوم مايبيني وكثير يفشلني قدامهم .. ياشيخ انا قررت اتركه .. انا عمري 21 سنه ماحملت منه ولابيني وبينه عيال .. الي ماطار قلبه لي يوم قلت تعبانه وماعندي احد يجيبني .. مايقدر يتحمل مسؤليتي كيف بيقدر يتحمل مسؤليتي ومسؤلية اي طفل بجيبه منه ؟ ياشيخ .. ابي اسألك هل قراري صحيح ؟ هل انا بالغت .. كل الي حولي .، اهلي صديقاتي ، كلمت مركز الدعوه والأرشاد كلهم يقولون لي نفس الشي ومعاي في الي اقوله .. ابي استشيرك هل انا غلطانه .. ؟