( ولا تعاونوا على الإثم والعدوان )

السلام عليكم ورحمة الله وبركاته انا طالب بالفرقة الثالثة كلية صيدلة . وطبعا فى الفترة الاخيرة عندنا فى مصر اى حد بيعرف يقرا ويكتب بيقف فى صيدلية كصيدلى نظرا لقلة فرص العمل بالاضافة الا ان الصيادلة لايقدرون على الوقوف فى صيدلياتهم طول اليوم من صباحه لمسائه فهم يلجاؤن لمساعدين للصيادلة . ونظرا لاحتياجى للمال اشتغلت فى صيدليتين الاول صباحا والثانية مساءا كى احقق دخل مادى علشان اصرف على نفسى من ماكل وملبس وغيره واراحة ابى من مصاريفى . وطبعا الوقوف ١٢ ساعة امر متعب للنفس لكنى اتحمل .وبما ان اى حد مالهوش علاقة بالمهنة اساسا بيشتغلها فمن باب اولى اشتغلها انا وخصوصا انها هتبقى مهنتى فى المستقبل وبردو اكتساب خبرات جديدة تفيدنى لما اتخرج وافتح صيدلية تمام ؟؟ المهم حصلت معيا موقف من يومين هذا الموقف يؤرقنى ولا يجعلنى استطيع النوم من تانيب الضمير واريد ان اكفر عن خطائى ولكن لااعرف كيف ، فتوكلت على الله ثم عليكم كى تدلونى عما افعله . ساحكى الموقف بالتفصيل الممل : منذ يومين دخل لى الصيدلية شاب يبلغ من العمر حوالى ٢٥ سنةوسال عن حقنة اسمها سنتوسينون هى موجودة ولا لا وكان عاوز منها ٤ امبولات فدورت عليها ولاقيتها المهم قولتله هى موجوده بس سعرها الطبيعى ٣ جنيه ... الدكتور صاحب الصيدلية بيبعها ب ٥ لانها جايله سوق سودا لانها ناقصة ومش موجودة فى الصيدليات قالى عارف قالى بس انا كنت عامل حسابى انها على ٣ جنيه يعنى الاربعة ب ١٢ جنيه مش عامل حسابى على ٢٠ وخصوصا انها لصيدلية مش ... فقولتله اوك قول للدكتور صاحب الصيدلية اللى انت شغال فيها وشوفه هيقولك ايه ...... قالى تمام بعدها بربع ساعة لاقيته جاى هو وراجل تانى بيقولى هات الحقن ...وقالى دهةالراجل اللى محتاجها عرفه هى غالية ليه ...فقولتله على السبب ..قالى مافيش مشاكل وقالى هى الحقن دى بتعمل ايه ؟؟ قولتله دى حقن بتساعد فى عمليه الولادة عن طريق انها بتزود الطلق (المفروض الطبيعى ان الحقن دى بتخرج بروشته مع كام حاجة دوا فى حالة الولادة ) بس عندنا لو دكتور بيولد بيكتبها فى روشتة ولو واحدة داية بتولد بتكتبها فى ورقه او بتبعت اى حد يقولك عاوز حقنة طلق فبنديهاله من غير روشته عادى ( بنتعامل بثقة كبيرة مع الناس) وفيه قاعدة ماشيين عليها وهى ان المريض لازم ياخد علاجه حتى لو ممعاهوش فلوس ففى الحالات دى ممكن نديله الحقن ونعرفه تمنها ويبقى دين عليه يدفعه فى اى وقت اهم حاجة ياخد علاجه ويخف والفلوس بعدين . فاديتهاله وقولت تلاقيه لف عليها كل الصيدليات ودى حالة ولادة ومش لازم اطلب روشته وخصوصا انه جاى مع واحد شغال فى صيدلية فممكن يكون جاب العلاج كله من الصيدلية دى والنوع ده اللى مش لاقيه المهم جبتله ٣ حقن هو كان محتاج اربعة وقولتله هى هتولد امته ... قالى انهارده بالليل قولتله يعنى مش دلوقتى قالى لا قولتله طيب كمان نص ساعة هكون جيبتلك الحقنة الرابعة ..... فراح مدينى ١٥ جنيه وسالنى سؤال مافيش حاجة لواحدة حامل ( اختى ) فى الشهر الاول وعندها كيس دم فى بطنها وعاوزين ننزل الجنين علشان مايتعبهاش والدكاترة عاملين فيها شيوخ ورافضين ينزلوه .... قولتله لا طبعا مافيش وحراااااااام قولتله وديها لدكتور كبير وهو يحدد لو الجنين لازم ينزل هو هينزله .......... وطبعا شكيت ان الحقن دى ممكن يستخدمها فى حالة الاجهاض اللى هو كان بيكلمنى فيها فقولتله اكيد انت عاوز الحقن علشان حالةولادة ولا فى الاجهاض قالى لا والله انا مراتى هتولد انهارده انما موضوع الاجهاض ده لاختى وحلف بالله .... ففى لحظة قولت سلمها لله ومتحوشش علاج عن حد واديله الحقن وربنا يسترها واديته الحقن وانا شاكك فى امره بس اتعاملت بخسن نيه وبعيدا عن سوء الظن واديته الحقن وسلمتها لله .. وكنت هعمله عليها خصم بس قولت بلاش . المهم بعدها بنص ساعه لاقيته جاى فمن جواى اتضايقت وقولت جوا نفسى ده اكيد عاوز الحقنة الرابعة وانا نسبت اجيبهاله فقولت هقوله بجى كمان شويه اكون بعت حد للصيدلية التانية بتاعة الدكتور يجيلهاله فلاقيته مش جاى يسال على الحقنة الرابعة انما بيقولى هى الحقن اللى اخدتها بتعمل ايه ...؟؟ بتنزل الجنين ولا بتثبت الجنين ....... ( طبعا معلوماتى عن الحقنة بكل تفاصيلها ماكنتش اعرفه علشان مادرستهاش كل اللى كنت اعرفه انها بتسهل الولادة مع نوع تانى من الحقن انما الية عملها مش عارف ) .....فحبيبت اخرج من السؤال علشان ماجاوبش غلط قولتله دى بتسهل الولادة ولو عاوز تعرف تفاصيل اكتر ممكن تسال الطبيب اللى هيولدها قالى ماشى طيب فيه ميزوتاك ..... لما قالى فيه ميزوتاك ... تيقنت انها عمليه اجهاضة لان الميزوتاك بيعمل اجهاض وكذا حد سالنى عليه كذا مرة وده مش بخرجه الابعد الولادة ويكون بروشته وكذا مرة اتسالت عليه وقولت انه مش موجود لانى عارفةان اللى بيسال هيستخدمه فى اجهاض فمش بديهوله ففى اللحظة دى قلبى انقبض وحسيت انى شاركت بسذاجتى وحسن نيتى وخطاى فى جريمة الاجهاض دى وزعلت اوى وارتبكت وخصوصا انى اول مرة اتعرض لموقف زى كده فقولتله ياريت تجيب الحقنة اللى انت اخدتها لو انت محترم فى الوقت ده كان معاه ست كبيرة تيجى ٤٠ سنة كده فقالته هو عاوز الحقن تانى ليه قالها لان اخوكى هيعك بالحقن ويستخدها غلط قالى هجيبهالك وراح سايبنى وماشى . وطبعا ماجاش ولما سالت عن الشاب ده علشان اعرفه هو مين .... عرفت انه مشارك دكتور فى صيدلية وبيقف معاه فيها وفى نفس الوقت ناس قالولى ان الواد ده اخلاقه مشةكويسه ومش بيعيد يكون حد تبعه ارتكب جريمة زنا وحصل حمل فعاوز ينزل الحمل ده.... لان الواد ده اتوهم فى واقعة زنا قبل كده فصعقت لما عرفت الكلام ده لانى ماكنتش اعرفه قبل كده وان معقوله فى حد كده وانى بسذاجتى ساعدت الشخص ده فى جريمته من ساعتها بقالى يومين ضميرى بيوجعنى اوى اوى اوى والافكار دى شاغلة بالى : ١_ انى مجرم وشاركت فى جريمة اجهاض وربنا هينتقم منى ٢_ انى كنت ممكن امنع الجريمة لو كنت قولتله هاتلى روشتة من الطبيب بس انا افترضت حسن النية ٣_ انى لما شكيت فيه لما قالى اخته حامل فى الشهر الاول وعاوزين ينزلوا الجنين كنت استمر فى الشك وامنع عنه الحقن بس لما حلفلى واللى جاى معاه اللى هو شغال فى صيدلية تانية اكد كلامه فقولت اديله العلاج وماتظنش ظن سوء لانك لو منعت عنه العلاج هيلف ويدور كتير علشان يلاقيه واحنا هدفنا نريح الناس مش نتعبهم وسيبها على الله وهو يسترها ..... فيه حته حابب ازودها فى النقطة دى ( كنت مرهق فى اليوم ده اوى وخصوصا انى كنت شغال من ٩ ساعات متواصل وكان فيه كذا حاجة شاغله بالى ومسيطرة على تفكيرى فده فدول ماخلونيش ادقق التفكير والشك فى ان الراجل ده ممكن يستخدم العلاج ده غلط .... كمان شكيت اساسا فى الدوا ممكن يعمل اجهاض ولا لا لانى ماعرفش طريقة عمله بالظبط داخل الجسم لانى مادرستهوش وخصوصا بردو ان فيه نوع تانى من الحقن من الحقن بيستخدم معاه علشان ينزل الجنين وده انا متاكد مليون فى المية انه بيعمل اجهاض لو واحدة حامل اخدته انما التانى ماكنتش متاكد منه ياترى ممكن يعمل اجهاض ولا لا .... وطبعا فكرت بحسن نيه وقولت سلمها لله واديهاله وربنا يسترها ) كمان من سذاجتى كنت هعمله خصم على العلاج .. فطبعا كنت ممكن اركز واوقف الجريمة بس للاسف محصلش علشان ماريكزتش واتعاملت بحسن نية ٤_ انى غلط لما وقفت فى مكان انا مش كفئ ليه لانى لسه مااتخرجتش وطبعا فيه معلومات كتير مااعرفاش فكده حرام وان مرتبى اللى كنت بقبضه حرام ..... وانى اتحمل الذنب فى جريمة الاجهاض دى لانى ماتخرجتش لسه ومعلوماتى عن نوع الدوا بتاع الولادة ده ٥_ انى كنت غبى لما قولتله هات الحقن على طول مع ان المفروض اتحايل عليه بذكاء واخودهم منه بس انا اتربكت اوى اوى اوى ٦_ ازاى بتعمل كده بحسن نيه واتسببت بسبها فى جريمة ٧_ ان ربنا هينتقم منى وهيعاقبنى عقاب شديد على الجريمة دى حاسس انى مش طايق نفسى وكاره نفسى اوى اوى وان ربنا هيعاقبنى على الغلطة دى ومش عارف اعمل ايه بالظبط او اتصرف ازاى لان ضميري بيوجعنى اوى اوى ##( ارجوا قراءة الموضوع بدقة وارشادى للخير والصواب ومايجب عليا فعله وياترى انا آثم مع انى اتعاملت بحسن نيه ولو كنت متاكد ان الدوا هيستخدم غلط كنت وقفته ومخرجتهوش لانها حصلت كذا مرة قبل كده ووقفت الدوا ومادهيتهوش للمريض) وجزاكم الله خيرا